Төсвийн тогтвортой байдлын зөвлөл 2027 оны төсвийн төсөл болон дунд хугацааны төсвийн хүрээнд зарлагын огцом тэлэлт, төрийн оролцооны өсөлт, өрийн эрсдэл нэмэгдэж байгааг анхаарууллаа.
Шинэчилсэн төсвийн хүрээгээр:
• Нэгдсэн төсвийн орлого — ₮41.3 их наяд
• Нийт зарлага — ₮43.6 их наяд буюу ДНБ-ий 37.8%
• Төсвийн алдагдал — ₮2.3 их наяд буюу ДНБ-ий 2.0%
Зөвлөлийн дүгнэлтээр төсвийн зарлагын ДНБ-д эзлэх 37.8% нь эдийн засгийн өсөлтийг хамгийн их дэмжих 27%-ийн түвшнээс 10.8 нэгж хувь, 2026–2030 оны үндсэн чиглэлийн 30%-ийн зорилтоос 7.8 нэгж хувиар өндөр байна. Мөн нийт зарлага 28.2%-иар өсөхөөр байгаа нь инфляцын дарамтыг нэмэгдүүлэх эрсдэлтэй гэж үзжээ.
Үүнтэй зэрэгцэн Засгийн газрын өрийг ДНБ-ий 50%-д хүргэхээр тооцсон нь таван жилийн 45%-ийн шалгуураас давж байгаа бөгөөд төсвийн тусгай шаардлагыг сулруулах өөрчлөлт нь цаашид төсвийг хэт тэлэх эрсдэл бий болгож болзошгүйг Зөвлөл онцолсон байна.
Иймд Төсвийн тогтвортой байдлын зөвлөлөөс төрийн оролцоог бууруулах, мөчлөг сөрсөн төсвийн бодлогыг тууштай хэрэгжүүлэх, өрийн эрсдэлийг тооцох, төсвийн сахилга батыг хадгалах чиглэлээр зөвлөмж хүргүүлжээ.
Эх сурвалж: www.parliament.mn
