АНУ-ын Холбооны Нөөцийн Сан (ХНС) 2026/10/28-ны мөнгөний бодлогын хурлаар бодлогын хүүг 3.75%–4.00%-ийн түвшинд хэвээр хадгалах шийдвэр гаргалаа. Шийдвэрийг Мөнгөний бодлогын хорооны 12 гишүүний 10 нь дэмжсэн бол үлдсэн 2 гишүүн бодлогын хүүг 25 суурь нэгжээр буюу 0.25 нэгж хувиар нэмэгдүүлэх санал гаргасан байна.
АНУ-ын 9-р сарын инфляц өмнөх оны мөн үеэс 3.7%-иар өссөн үзүүлэлттэй гарсан. ХНС инфляц өндөр хэвээр байгааг онцлохын зэрэгцээ эдийн засгийн идэвхжил хүчтэй, дотоодын хэрэглээ тогтвортой, бүтээмжийн өсөлт болон бизнесийн хөрөнгө оруулалт сайн байгаа талаар онцлов. Мөн геополитикийн нөхцөл байдлаас шалтгаалан эдийн засгийн тодорхойгүй байдал өндөр хэвээр байгааг дурджээ.
ХНС-ийн шийдвэрийн дараа АНУ-ын голлох хувьцааны индексүүд өсөлттэй хаагдав. Тодруулбал, Dow Jones индекс 0.19%, S&P 500 индекс 0.28%, Nasdaq Composite индекс 0.27%-иар тус тус өсөж хаагджээ.
CME группийн FedWatch Tool-ийн тооцооллоор ирэх 12-р сарын мөнгөний бодлогын хурлаар ХНС бодлогын хүүг 0.25 нэгж хувиар нэмэгдүүлэх магадлал 74.4%, хэвээр хадгалах магадлал 25.6% байна.
