ХНС-аас энэ он гарснаас хойш анх удаа бодлогын хүүгээ 0.25 нэгж хувиар бууруулж, 4.0-4.25%-д хүргэлээ. Энэхүү шийдвэрийн талаар ХНС-ийн Тэргүүн Жером Пауэл танилцуулахдаа хэдий ажилгүйдлийн түвшин бага байгаа ч ажил олголтын хурд удааширч байгаа нь Төв банкны үндсэн 2 зорилгын тэнцвэрт байдалд сөргөөр нөлөөлж болзошгүй тул энэхүү шийдвэрийг гаргасан тухай мэдэгдсэн юм.
Мөн Төв банк бодлогын хүүгээ буулгахаас гадна өөрийн эзэмшиж буй үнэт цаасыг зах зээлд нийлүүлэх үйл ажиллагаагаа цаашид үргэлжлүүлэхээр шийдвэрлэсэн байна.
Өнөөгийн нөхцөл байдлын тухайд
– 2025 оны эхний хагас жилд АНУ-ын ДНБ 1.5%-иар өссөн нь өнгөрсөн оны мөн үеэс 1 нэгж хувиар буурсан үзүүлэлт бөгөөд энэхүү бууралтын үндсэн шалтгаан нь хувь хүмүүс хэрэглээгээ танаж эхэлсэнтэй холбоотой байна. Харин эсрэгээр бизнесийн хөрөнгө оруулалтууд, биет болон биет бус хөрөнгө худалдан авах үйл ажиллагаа нэмэгдсэн байна.
– Өнгөрсөн 2 сарын хугацаанд ажил олголт мэдэгдэхүйц суларч, 2025 оны 08-р сарын дүн 22 мянга болж буурсан нь оны эхнээс сард 139-256 мянгын хэлбэлзэлтэй нэмэгдэж байсан ажил олголттой харьцуулахад эрс суларсан үзүүлэлт юм. Энэ нь цагаачлалын хатуу бодлого, ажиллах хүчний оролцооны түвшин буурсантай холбоотой байна.
– 2025 оны 8-р сарын байдлаар инфляц жилийн дүнгээр 2.7%-иар өссөн бөгөөд үүнд бараа, бүтээгдэхүүний үнийн өсөлт голлон нөлөөлсөн байна. Харин үйлчилгээний инфляцын түвшин буурсан хэвээр байна. Богино хугацааны инфляцын төсөөлөл тарифтай холбоотой нэмэгдсэн ч урт хугацааны таамаглал зорилтод түвшин 2.0%-тай нийцтэй хэвээр хадгалагдаж байна.
– Засгийн газраас хэрэгжүүлэх бодлого болон түүний эдийн засагт үзүүлэх нөлөө тодорхой бус хэвээр, өндөр тариф зарим төрлийн бүтээгдэхүүний үнийг өсгөж эхэлсэн ч ерөнхий дүр зураг төсөөллийн хүрээнд байна.
Цаашдын төсөөлөл
2025 оны 09-р сарын эдийн засгийн төсөөлөлд голч дүнгээр
– Инфляцын түвшин оны эцэст 3.0%, ирэх жил 2.6%, 2027 онд 2.1% байхаар,
– Ажилгүйдлийн түвшин оны эцэст 4.5%, цаашид бага зэрэг буурахаар,
– Бодлогын хүү оны сүүлч гэхэд 3.6%, 2026 онд 3.4%, 2027 онд 3.1% байхаар,
– ДНБ-ий өсөлт оны эцэст 1.6%-иар, ирэх жил 1.8%-иар байхаар тус тус төсөөлөлд тусгасан байна.
Дүгнэлт: АНУ-ын ХНС-ийн бодлогын хүү нь зах зээлийн суурь хүү болдгоороо түүний өөрчлөлт зах зээлд өндөр ач холбогдолтой байдаг.
– Хэвлэлийн хурлын үеэр ДНБ-ий өсөлт бодит байдалд тооцоолсноос сайн байхаар байна, мөн энэ сард гаргасан бодлогын хүүгийн төсөөллийн голч өнгөрсөн 06-р сард гаргасан дүнгээс 0.25%-иар доогуур байна гэж мэдэгдсэн нь цаашид бодлогын хүү буурах хүлээлтийг зах зээлд үүсгэх дохио боллоо.
– Мөн Холбооны Нээлттэй Зах Зээлийн Хорооны 19 гишүүний 10 нь бодлогын хүүг цаашид 2 ба түүнээс дээш, 9 нь бууруулахгүй буюу 1 удаа бууруулах нь зүйтэй тухай өөрсдийн саналаа өгсөн байгаа нь дээрх дохиог улам батжуулж байна.
Гэсэн хэдий ч бид дараагийн ХНС-ийн хуралдаан болох хүртэл инфляц болон хөдөлмөрийн зах зээлийн мэдээллүүдийг анхааралтай ажиглах нь зүйтэй байна.
Боломж: Ийнхүү суурь хүү бууснаар эх үүсвэрийн зардал буурч бизнесүүдийн идэвхжил нэмэгдэх, үнэт цаасны үнэлгээ өсөх суурь нөхцөл болж өгдөг.
2025 оны 09-р сар гарснаас хойш ажил олголттой холбоотой мэдээллүүд тааруу гарч байсан нь энэ удаад бодлогын хүүг 0.25%-иар нэмэгдүүлэх магадлалыг 90% давуулаад байсан юм. Тиймээс энэхүү өөрчлөлтийн нөлөө зах зээлд аль хэдийн тусгалаа олсон байх магадлал өндөр.
Хэрэв ХНС-аас бодлогын хүүг цаашид 2 ба түүнээс дээш бууруулах, өөрийн эзэмшиж буй үнэт цаасыг зах зээлд их хэмжээгээр нийлүүлж эхэлбэл энэ нь хөрөнгийн зах зээлд эерэг нөлөө үзүүлж, хувьцаа, бондын үнэ өсөх суурь нөхцөл бүрдэх юм.
Та бүхэн гадаад хувьцааны талаар мэдээлэл авч арилжаанд оролцохыг хүсэж байвал дараах линкээр мэдээллээ бөглөнө үү. 👉https://forms.office.com/r/3ZRv8AKGAi
