Хонг Конгийн хөрөнгийн биржэд бүртгэлтэй ТОП 88 компаниас бүрдэх Ханг Сэнг индекс 2025.09.12-ны өдрийн байдлаар оны эхнээс 34.5%-иар өсөж, 26,388.16 нэгжид хүрээд байна.
БНХАУ-ын бодит ДНБ-ий өсөлт 2025 оны 2-р улиралд 5.2%-тай гарсан бөгөөд энэхүү үзүүлэлтийг бүлгээр нь задлан авч үзэхэд түүхий эдийн салбар 3.8%-иар, боловсруулах үйлдвэрлэлийн салбар 4.8%-иар, үйлчилгээний салбар 5.7%-иар тус тус өссөн байна. Бидний хамгийн их сонирхдог барилга угсралтын салбар 0.6%-ийн уналттай байгаа ч үл хөдлөхийн салбар 1.0%-иар өссөн байгаа нь тус салбарын эдийн засгийн идэвхжил сэргэж байх магадлалыг нэмэгдүүлж байна. Харин 2025 оны 08-р сарын хэрэглэгчийн үнийн индекс “-0.4%”-ийн өөрчлөлттэй буюу дифляцтай гарсан ба үүнд хүнсний салбарын үнийн индекс 2.5%-иар, харилцаа холбоо, тээврийн салбарын үзүүлэлт 2.4%-иар буурсан нь голчлон нөлөөлсөн байна.
Хэдий тус улсын дотоод эрэлт “тааруухан” байгаа боловч Hang Seng Index -ийн энэхүү өсөлтийг дэд индексийн үзүүлэлтүүд болох санхүүгийн салбарын индекс оны эхнээс 26.2%-иар, хөрөнгийн (property) индекс 21.9%-иар, худалдаа, аж үйлдвэрийн салбарын индекс 25.6%-иар тус тус өссөн нь тайлбарлаж байна.
Энэхүү үзүүлэлтийг бататгах үүднээс тус индексийн салбар индекс болох Hang Seng Composite Index болон түүний дэд индексийн өөрчлөлтийг авч үзэхэд мөчлөг дагасан салбаруудын өсөлт 36.3%-83.3% байгаа бол хамгаалалтын салбарын индексүүд хамгийн багадаа 4.82%-ийн уналттай, хамгийн өндөр нь 38.2%-ийн өсөлттэй байна.
Hang Seng Index өссөнтэй холбоотойгоор ногдол ашгийн өгөөж буурч 3.2%-тай байгаа бол P/E буюу үнэ/ашгийн харьцаа нэмэгдэж, 12.6 орчимд хэлбэлзэж байна. Түүнчлэн зах зээл дэх хөрөнгө оруулагчдын тодорхой бус байдал буюу айдсыг илтгэдэг Hang Seng Volatility Index 21 нэгж орчимд байгаа нь тарифын дайнаас үүдэлтэй 2025 оны 3, 4-р сарын өндөр үзүүлэлтээс даруй 2 дахин бага үзүүлэлт болоод байна.
Ийнхүү хөрөнгө оруулагчид мөчлөг дагасан хөрөнгө оруулалт илүүтэй хийж байгаа нь БНХАУ-ын эдийн засгийн цаашдын төлөв байдалд эерэг хүлээлттэй байгааг харуулж байна. Мөн VIX индекс харьцангуй буурсан нь зах зээл дэх тодорхой бус байдал буурсныг илтгэж байгаа бөгөөд хөрөнгө оруулагчдад, тэр тусмаа үүсмэл санхүүгийн хэрэгсэлд хөрөнгө оруулах сонирхолтой хөрөнгө оруулагчдад таатай нөхцөлийг бүрдүүлж байна.
Та бүхэн гадаад хувьцааны талаар мэдээлэл авч арилжаанд оролцохыг хүсэж байвал дараах линкээр мэдээллээ бөглөнө үү 👉https://forms.office.com/r/3ZRv8AKGAi
Та бүхэн ХЗЗ-ийн онцлох мэдээллийг 7 хоног бүр имэйлээр хүлээн авахыг хүсвэл дараах линкээр имэйл хаягаа бүртгүүлээрэй 👉https://dashboard.mailerlite.com/forms/1498534/155432022772286687/share
7777 – 6377
