2025 онд системд нөлөө бүхий нээлттэй 5 банкны хувьд нийт актив болон зээлийн багцын өсөлт үргэлжилсэн бөгөөд зах зээлийн идэвх харьцангуй тогтвортой хадгалагдсан жил байлаа. Харин санхүүжилтийн өртөг, тэр дундаа хадгаламжийн хүүгийн зардал өссөн нь ашигт ажиллагаанд тодорхой хэмжээний дарамт үзүүлсэн ч банкнуудын санхүүгийн суурь үзүүлэлтүүд хэвээр хадгалагдсан байна. Таван банкны санхүүгийн гүйцэтгэлийг нэгтгэн харахад өсөлт, үр ашиг, эрсдэлийн удирдлагын хувьд ялгаатай онцлогууд тодорхой ажиглагдаж байна.
Хаанбанк ХК 2025 онд салбартаа цэвэр ашгийн хэмжээгээр тэргүүлж, ашиг өсөлтөө хадгалсан цөөн банкны нэг байв. Актив, зээлийн багцын тэлэлт өндөр түвшинд үргэлжилсэн бөгөөд өөрийн хөрөнгийн өгөөж (ROE) 24.6 хувьтай гарсан нь томоохон хэмжээтэй банкны хувьд ашигт ажиллагааг тогтвортой түвшинд хадгалж чадсаныг илтгэж байна.
Хасбанк ХК-ийн хувьд цэвэр ашиг өмнөх оны түвшинд ойролцоо хадгалагдсан боловч өөрийн хөрөнгийн өгөөж 21.8 хувьтай, чанаргүй зээлийн түвшин 2.5 хувьтай гарсан нь эрсдэлийн удирдлага, ашигт ажиллагааны тэнцвэрийг хадгалж буйг харуулж байна.
Харин Голомтбанк ХК, Худалдаа Хөгжлийн банк ХК, Төрийн банк ХК-ийн хувьд нийт актив, зээлийн багцын өсөлт харьцангуй өндөр түвшинд хадгалагдсан хэдий ч хүүгийн зардлын огцом өсөлтөөс шалтгаалан цэвэр ашиг буурах хандлага ажиглагдсан байна.
Салбарын суурь үзүүлэлтүүд (актив, зээлийн өсөлт, NPL) нийтдээ эрүүл, тогтвортой хэвээр байна. Хаанбанк ХК нь активын хэмжээ, ашигт ажиллагаа, үнэлгээний тэнцвэрийн хувьд хамгийн давуу байр суурьтай байна.
Хасбанк ХК нь эрсдэл багатай, тогтвортой өгөөж бүхий банк хэвээр байна.
Голомтбанк ХК-ийн цэвэр ашиг 2025 онд түр хугацаанд буурсан боловч зээлийн чанар сайжирч, зах зээлийн үнэлгээ харьцангуй доогуур түвшинд үнэлэгдсэн байх боломжтой байна.
Худалдаа Хөгжлийн банк ХК болон Төрийн банк ХК-ийн хувьд үнэлгээ харьцангуй бага боловч ашигт ажиллагаа, капиталын өсөлт сул байгаа нь хөрөнгө оруулалтын эрсдэлийг тодорхой хэмжээнд нэмэгдүүлүүлэх боломжтой байна.
Иймд дунд болон урт хугацааны хөрөнгө оруулалтын үүднээс ашигт ажиллагаа, эрсдэлийн удирдлага, үнэлгээний тэнцвэрийг харгалзан сонголт хийх нь зүйтэй гэж дүгнэж байна.
