2025 оны байдлаар тус компанийн борлуулалтын орлого 99.0 тэрбум төгрөгт хүрч өмнөх оноос 26.9%-иар өссөн бол цэвэр ашиг 14.3 тэрбум төгрөгт хүрсэн байна. “Түмэн шувуут 3” төслийн хэрэгжилтээр үйлдвэрлэлийн хүчин чадлаа нэмэгдүүлсэн бөгөөд цаашид капитал зардлын дарамт буурч, ашигт ажиллагаа болон мөнгөн урсгал сайжрах төлөвтэй гэж үзэж байна.
Мөн өндөгний хэрэглээ урт хугацаанд өсөх хандлагатай байгаа нь компанийн борлуулалт, үйлдвэрлэлийн өсөлтийг дэмжих гол хүчин зүйлсийн нэг болохоор байна.
Цаашид хувьцааны үнэлгээнд нөлөөлж болохуйц 3 хүчин зүйлсийг товч дурдвал:
📍Үйлдвэрлэлийн хүчин чадлын өсөлт
Түмэн шувуут ХК нь “Түмэн шувуут 3” төслийг хэрэгжүүлснээр дотоодын өндөгний хэрэгцээний 50 орчим хувийг дангаар хангах хүчин чадалд хүрээд байна. Үйлдвэрлэлийн өргөтгөлийн үндсэн бүтээн байгуулалтын ажлууд дууссанаар цаашид капитал зардлын дарамт буурч, ашигт ажиллагаа болон мөнгөн урсгалд эерэг нөлөө үзүүлэх боломжтой гэж үзэж байна. Мөн тогтмол ногдол ашиг хуваарилах боломж нэмэгдэх хүлээлттэй байна.
📍Өндөгний хэрэглээний өсөлт
Монгол Улсад нэг хүнд ногдох өндөгний сарын дундаж хэрэглээ сүүлийн жилүүдэд тогтвортой өсөх хандлагатай байна. Тухайлбал, 2019 онд нэг хүнд сард дунджаар 5.2 ширхэг өндөг ногдож байсан бол 2024 онд 7.2 ширхэгт хүрсэн бөгөөд сүүлийн 5 жилийн нийлмэл жилийн дундаж өсөлт (CAGR) ойролцоогоор 6.7% байна. Мөн 2023 онд нэгд хүнд ногдох өндөгний сарын дундаж хэрэглээ 9.1 ширхэгт хүрч хамгийн өндөр түвшинд хүрсэн үзүүлэлттэй байна. Эрүүл хооллолт, уургаар баялаг хүнсний хэрэглээ нэмэгдэж буйтай холбоотойгоор өндөгний эрэлт дунд болон урт хугацаанд өсөх төлөвтэй байгаа нь дотоодын зах зээлийн 50 орчим хувийг хангаж буй Түмэн шувуут ХК-ийн борлуулалт болон үйлдвэрлэлийн өсөлтийг дэмжих боломжтой гэж үзэж байна.
📍Хувьцаа халааслах хөтөлбөр
Компанийн зүгээс 2026 онд 500 сая төгрөгийн хувьцаа халааслах хөтөлбөр хэрэгжүүлэхээр төлөвлөж буйгаа энэ оны хувьцаа эзэмшигчдийн хурлын үеэр удирдлагын зүгээс мэдээлсэн. Хувьцаа халааслах нь зах зээл дэх эргэлтэд байгаа хувьцааны тоог бууруулснаар нэгж хувьцаанд ногдох ашиг (EPS) болон хувьцааны үнэлгээнд эерэг нөлөө үзүүлэх боломжтой.
Дээрх судалгааг ЦАХИМ НОМ хэлбэрээр унших
