Дэлхийн улс орнуудын геополитикийн зөрчилдөөн, худалдааны дайн, тариф, тэдгээртэй холбоотой тодорхой бус байдал зах зээлд давамгайлснаар алтны ханш 2026 оны 01-р сард түүхэн дээд ханш болох 5600 ам.доллар/унц орчимд хүрсэн бөгөөд бид алтны тухай 3 цуврал нийтлэлийг 2025 оны 12-р сарын эхээр (ханш 4200 орчим ам.доллар/унц) та бүхэнд хүргэсэн билээ.
Харин энэ удаагийн нийтлэлээр дараагийн “алт” байх магадлал хамгийн өндөр өнгөт металлын нэг “Зэс”-ийг онцолж байна.
Зэс нь бидний өдөр тутмын амьдралын салшгүй хэсэг бөгөөд утас, интернет, тог цахилгаан, автомашин гэх мэт зэс орохгүй цахилгаан хэрэгсэл байхгүй гэхэд хэтрүүлсэн болохгүй.
Түүнчлэн өнөөдрийн байдлаар хөгжиж буй улс орнуудын хүн амын тоо хөгжингүй улс орнуудын хүн амын тооноос ойролцоогоор 5 дахин өндөр байгаа бөгөөд тэдгээр улс орнуудын иргэдийн амьдралын чанар сайжрахын хэрээр цахилгааны хэрэглээ улам нэмэгдэх нь гарцаагүй юм.
Гэтэл энэхүү уламжлалт хэрэглээнээс гадна техник, технологийн дэвшлийн үр дүнд зэсийн хэрэглээ улам бүр нэмэгдэх шинэ салбарууд гарч ирсээр байгаа нь зэсийн эрэлтийг улам бүр өрдөж байна.
Үүний томоохон төлөөлөл нь сүүлийн жилүүдэд дэлхий даяар шуугиж буй “HOT” сэдвүүд болох “Эрчим хүчний ногоон шилжилт” болон Цахим шилжилт AI, тэр дундаа “Өгөгдөл Боловсруулах Төв”-үүдийн үйл ажиллагааны эрчимжилт юм.
Тус тайланд дурдсанаар өнөөгийн цахилгааны хэрэгцээний 92%-ийг уламжлалт хэрэглээ, 7%-ийг эрчим хүчний шилжилт, 1%-ийг цахим шилжилт эзэлж байгаа бол 2050 он гэхэд энэхүү үзүүлэлт 71%, 23%, 6% болж өөрчлөгдөнө хэмээн таамаглал дэвшүүлсэн байна.
Энэхүү өөрчлөлтөд үндэслэн дэлхийн зэсийн эрэлт 2050 он гэхэд өнөөгийн түвшнээс ойролцоогоор 70%-иар өсөн нэмэгдэж, 50 сая орчим тоннд хүрнэ хэмээн таамаглал дэвшүүлсэн байна.
